| 上星期有朋自遠方來﹐帶佢哋玩咗幾日﹐唔係好夠瞓﹐就病咗啦~~
最慘係連累到屋企人..... 真係希望快d好返~~
|
| |
| 星期六睇咗-救參96小時 (Taken) 故事簡單流暢﹐節奏明快﹐無冷場 ﹐鐘意動作片﹐呢套會係不錯既算擇。除咗開頭交代主角既背景之外﹐佢個女出咗事之後﹐一路都不乏動作場片。而且唔拖泥帶水﹐絕無果d用支槍指住對方個頭然後講幾粒鐘之後唔知因咩事﹐開唔到槍﹐殺唔到人呢d咁唔sense既場片。又無一d好人不停咁同d壞人講道理﹐最後又放過佢之類。主角實實在在將個人感情帶入戲中﹐其中有段有個壞人講 it's just business, nothing personal.. 但主角就講返句 to me.. it's.. 然後開槍﹐絕對係個人恩怨。觀眾睇得好痛快﹗雖然現實要一個人打咁多個係無可能。如果大家玩過counter strike, battlefield 或 rainbow six之類既game(係﹐本人比較老﹐且好耐無打機)你就知要一個人打瓜成team人係件幾咁難既事。但睇戲最緊要富娛樂性﹐呢齣戲絕對做到。 星期日打完ball﹐食咗個tea夜晚就上咗山頂行﹐仲食埋飯先落黎。去咗Spaghetti360﹐d野ok﹐唔算好好食﹐不過價錢唔貴。 http://www.openrice.com/restaurant/sr2.htm?shopid=27153 叫咗雞扒意粉加cheese焗(但加咗都好小cheese)﹐帶子pizza﹐薯角同埋石頭窩炒雜菜(石頭窩上﹐熱辣辣) 賣單侍應問有無spaghetti house會員card﹐有9折﹐好彩我fd有﹐埋單$200有找。原來佢都係spaghetti house既﹐即係大家樂啦。唉﹐估唔到去到邊都逃唔出大家樂﹐平日lunch都已經食唔少﹐有時夜晚約食飯都有去下spaghetti house﹐連上到山頂都係。食完出去見到有幾隻狗仔﹐忍唔住同佢哋影咗幾張﹐真係好得意﹗﹗     
食完已經10點﹐我哋打算行落山。哈哈﹐但唔識路﹐結果行咗兩個鐘﹐以下就係我哋果晚行既路線。首先由凌霄閣出發﹐行百加道﹐經過“摘星閣”﹐轉入山頂道﹐再源灣仔狹道落去寶雲道﹐再向西行(因為想落香港站)﹐去到波老道交界轉入馬己仙峽道﹐去到纜車路就源纜車路直落﹐源花園道落到中環穿過長江中心個公園落到hsbc總部﹐過馬路到達中環站﹐再行去香港站上車。 
|
| |
| 手續費=利息﹖
今日收到某銀行電話推銷借錢服務﹐都係果d用信用card借錢。我又係好似平時咁話﹐唔需要﹐無興趣唔該咁禮貌地收線﹐但我聽到對方話”無利息“﹗ 我就好好奇啦﹐佢話淨係要比返零點幾巴仙既手續費﹐一聽手續費我仲以為一次性﹐點知一問佢就話個個月比。我真係好迷﹐我好似諗唔起邊樣野既收費係期期要比 手續費﹐同埋咁樣同收利息有咩分別呀﹖ 我以前讀econ果陣記得利息即係用果筆錢既cost.... 點都好啦﹐身為一搬小市民既我唔識金融界咁多術語﹐我淨係覺得呢種講法有誤導性。
呢兩個禮拜都係到搵緊人幫我做張玻璃枱﹐但可能生意太細﹐好多都亂報價比我。最高果間係駱克道quote我6-7千﹗﹗最平係大角嘴都要$2500。我張枱只係20"x41"用4分厚玻璃(半寸)加四隻腳﹐d腳只係用膠水黏(UV膠)。成本大概係玻璃($200)+腳($50-80x4)+UV膠同UV燈(網上見到大概$200到﹐未搵到鋪頭賣)﹐加埋都係機百﹐食水真係好深。
|
| |
| 一。為大家介紹一項既環保又實用既發明。係由我公司既秘書發明~
材料﹕一疊只用過一面既A4紙﹐刀(cutter)﹐間尺﹐一塊用黎墊住介野既版﹐打窿機﹐膠圈(鐵圈都得)
做法﹕先張最面張紙對接﹐然後張整疊紙平放﹐用cutter源住剛才對接既接痕﹐時最好有塊版墊住﹐同埋可以用把間尺作輔助。好後就張兩疊紙二合一疊起來﹐打孔﹐再用膠圈串起即成。
由於時間關係﹐已經做好咗一本。
二。居然有人咁開包蝦條﹐實在係第一次見。不過食時真係幾方便。
三。今晚生日飯去咗又一城皇府食。第一次去﹐以為係普通粥粉麵店﹐但價錢都唔平﹐一豌麵都要$40。我哋兩個人叫咗個二人餐﹐d野雖然睇落細細碟﹐但份量都唔少﹐食得好飽。期間仲撞到小儀﹐就坐隔離檯﹐真人靚過上鏡。然後又見到鐘麗淇入黎食。估唔到呢間粥麵店咁多明星幫親。
|
| |
| 時間真係過得好快﹐小白黎緊既禮拜六14號就一歲啦﹗﹗
  
|
| |
